امراض كتير للاسف اسمها بيوحي بشيء مختلف عن طبيعتها ومش ذنب العامة انهم معندهمش من الثقافة الكافية ف معرفة تسمية كل مرض .. ف خلينا نقول كلمتين
ايه هي حمى البحر المتوسط؟
ده مرض جيني بيصيب الانسان بيكون عبارة عن انتفاضة ف الجهاز المناعي بيخرج اجسام اسمها Pro inflammatory cells بتعمل ارتفاع درجة حرارة والتهاب في الاغشية عامة ف الجسم ... يعني غشاء اللي بيغلف الامعاء ... الغشاء اللي بيغلف الرئتين ... الغشاء اللي بيغلف القلب... حتى بيصيب التجاويف واهمها طبعا المفاصل الكبيرة
طب ليه اتسمى كده؟
لانه قدرا المرضى اللي اتصابوا بيه كانوا بيسكنوا ف النطاق حول البحر المتوسط ف العلماء ربطوا اسم المرض بالمكان اللي اكتشفوه فيه "يمكن يكون ليه دلالة من طبيعة اكل او جو او ايا يكن العامل اللي فعلا ممكن يكون موجود حصرا ف المكان ده"
المرض نفسه بيظهر ف سن مبكر .. وبما ان المرض جيني يبقى لازم الاب والام يكون عندهم الجين اللي هيتم توريثه للابناء وساعتها هيكون المرض عنيف .. لو احد الاباء بس هيكون المرض ضعيف الى متوسط
المشكلة مش ف الالتهاب لانه بيجي ع هيئة episodes بتستمر ايام وتختفي ع فترات ... بس لو الموضوع متعالجش ممكن يدمر الاعضاء اللي مغلفة بالاغشية دي وطبعا يعمل حاجة اسمها deformity للمفاصل الملتهبة ... والخطر الاكبر انه بيرسب مواد ف الكلى مع الوقت بتؤدي للفشل الكلوي بنسمي الحالة دي renal amyloidosis
علاجها حصرا هو الكولشيسين هو بابا المجال هنا "وشوية ادوية تانية" ... المريض بيقدر يتعايش مع المرض لو تم اكتشافه وعلاجه ف وقت مبكر .. غير كده بيكون غلس شويتين.
متتردوش تكلمونا ، معاكم للرد علي استفساراتكم ٢٤ ساعة .
#Always_there_to_care
