سي فول أصالة الحارة بشياكة "سي السيد"

القصة بدأت من الاسم: "سي فول". الاسم لوحده كان تحدي، لأنه جامع بين حاجتين: "الفول" (بكل أصالته وطعمه الشعبي) ولقب "سي" (بكل الشياكة والاحترام). المطلوب كان لوجو يعمل الخلطة دي. قلت بس، إحنا مش هنعمل لوجو عادي. إحنا هنخلق "شخصية". هي دي الفكرة: حولت "قدرة الفول" نفسها لشخصية ليها كاريزما. الأصل: جسم اللوجو هو "القدرة" بتاعتنا، ده الأساس. الشياكة: عشان هو "سي" فول، لبسناه "بابيون" (Bow tie) وركبنا له شنب مصري أصيل بابتسامة واثقة. الصنعة: بحركة فنية، غطا القدرة بقى "قبعة شيف" احترافية، وإيد القدرة بقت "مغرفة". يعني بنقول للناس: "الأكل هنا معمول بمزاج وبصنعة". النتيجة؟ مش مجرد لوجو. إحنا عملنا "أيقونة" (Mascot) للمكان. شخصية "سي فول" بنفسه، المعلم الجنتلمان اللي بيرحب بيك وبيوعدك بـ "حدوتة مصرية" على أصولها. لوجو مرح، بيتعلق في الذاكرة، وبيحكي قصة البراند في ثانية.