ايه الفرق بين انك تفتح شركة في مصر او دبي ولا حتي اوروبا؟ خلينا نتكلم عنهم بالترتيب أولاً : دبي علشان تفتح شركة في دبي تكلفتها عالية جدا وطبعا التكلفة دي بتكون من غير فيزا (إقامة) لصاحب الشركة ولو معاك شركاء فا هتحتاج تزود اقامات وكل إقامة هيتدفع عليها مبلغ. نيجي لنقطة المبلغ اللي بتدفعة، هل بيتدفع مرة واحدة؟ الاجابة طبعا لا انت مطالب تدفع كل سنة نفس المبلغ او ممكن يزيد عليك علشان تفضل شركتك شغالة ورخصتها سارية. طب مع كل دا هل في مميزات لفتح شركة في دبي؟ ناس كتير بتقول ان مفيش ضرايب، ودا كلام جميل جدا بس انت بتدفع مبلغ كبير سنويا علي تجديد رخصة شركتك وبغض النظر عن مدة عمل شركتك في دبي سواء سنة او ٢٠ سنة داخل البلد دا مش هيعود عليك انت كا شخص باي نفع. فا بالنسبالي انا افضل اشوف دولة ادفع تكلفة انشاء مرة واحدة حتي ولو عالية بس هوفر علي نفسي علي مدار حياة الشركة مبالغ سنوية لابقائها شغالة وكمان دفع الضرائب في دولة اوروبية مع دخل متزايد سنويا في الشركة بيساعدك في انك تنقل اقامتك في الدولة دي وبعد فتره وطبقا لقانون الدولة بتحصل علي جنسية بالاضافة لصعوبة فتح حساب بنكي لشركتك. ثانياً : مصر تسجيل الشركة في مصر سهل جدا ? اكيد بهزر طبعا. التسجيل في مصر بيحتاج تعدي علي مرحلة اوراق كتير ودفع رسوم بغض النظر ان كانت صغيره او كبيرة بس مرحلة التسجيل والاوراق المطلوبه هتاخد معاك من اسبوع لحد ٣ اسابيع او حتي شهر بعد كدة هتقدم اوراقك وتنتظر علي حسب انت هتقدمها لاي جهة وبتلقي نفسك دافع مبلغ كبير في النهاية حتي بدون مايكون عندك مقر للشركة وعلشان تسجل لازم يكون عندك مقر او تاجر واحد وتكلفة الايجار في الغالب بتكون عالية فا بالتالي تكلفة كبيره عليك حتي من قبل ماتبدا المشروع وفي حاجات تانيه محتاج تدفعلها. الناس اللي متعوده علي الخدمات الالكترونية هتحس بصعوبه وتعب نفسي لانهاء المرحلة دي وفي ناس بتلجأ لمكاتب تخلص الموضوع نيابة عنها وطبعا خطوة زي دي هتكلفك مبلغ اضافي. ثالثاً : أوروبا التسجيل في اوروبا يعتبر الاسهل علي الاطلاق في بعض الدول وفي دول تانية بتقدر تخلص جزء من التسجيل وبيتطلب حضورك بعد كدة لانهاء بعض الاجرءات وكمان فتح حساب بنكي وطبعا نظر لصعوبة نقطة الحساب البنكي دي لانك غير مقيم في الدولة ولان فتح الحساب بقا غير متاح بسهوله زي زمان واكيد انتو عارفين الاسباب لكن دا ما يخلي العملية مستحيله او معقدة زي دبي مثلا في دول بتقدر تعمل التسجيل وفتح الحساب البنكي بالكامل اونلاين وتكلفة انشاء الشركة بيتم دفعة مرة واحدة فقط وفي دول تانية زي ماذكرت بتعمل جزء والجزء المتبقي بيتطلب حضورك شخصيا باحد الطرق التاليه : · فيزا بزنس ودي بتكون بدعوة من المحامي او الشخص المسئول عن تسجيل شركتك · فيزا سياحة بمدة لاتقل عن ٧ ايام الفروقات دي باختصار شديد علشان لو بتخطط تسجل شركة تعرف ايه افضل مكان تسجل فيه شركتك.