لو انت لسه داخل عالم الفريلا نسينج ولسه مش عارف تبدأ منين، أو إيه اللي فعلاً محتاجه، تعالى نحط النقط على الحروف سوا طب إيه اللي محتاجه علشان أبدأ؟ 1. مهارة أي مهارة تقدر تقدمها للناس وتحل بيها مشكلة. ممكن تكون بتعرف تشتغل على Excel، بتصميم، بتكتب، تبرمج، أو حتى بترجم. لو لسه معندكش مهارة؟ ولا يهمك، اتعلم واحدة! اليوتيوب مليان كنوز. 2. بروفايل كويس سواء على مواقع زي "مستقل" أو "خمسات" أو "Upwork"، لازم يكون عندك بروفايل يوضح إنت مين، بتعمل إيه، و ايه اللي يميزك عن غيرك. 3. نماذج شغل حتى لو لسه ما اشتغلت مع عملاء، ممكن تعمل مشاريع وهمية وتعرضها. العميل مش فارق معاه الشغل ده اتعمل لمين، أهم حاجة يكون متقن. 4. عرض خدماتك بطريقة جذابة اكتب خدمتك أو عرضك بلغة بسيطة ومباشرة، فهم العميل كأنك بتكلمه وش لوش. 5. صبر ومثابرة الشغل مش هيجي من أول يوم، ولا من أول أسبوع. بس اللي بيكمل، بيوصل. طيب.. هل الحاجات دي مهمة فعلاً؟ آه، مهمة جدًا. الفريلانسينج مش لعب، ده شغل حر، ولازم تكون جاهزله. كل خطوة من اللي فوق هتسهل عليك الطريق، وتفرق بين حد بيشتغل مرة كل ٣ شهور، وحد بيدخل دخل ثابت شهريًا.