كتير بقى يسأل ايه هو "تحليل البيانات"؟ وفتكر ليه كل شركه بقت بتدور عليه؟ تعالى كده أقولك لو عندك شركه أو مشروع صغير، وعاوز تعرف: مين أكتر عميل بيشتري منك وبالتالى تقدر مثلا تعمله خصومات لزياده تردده اليك ؟ إيه المنتج اللي عامل شغل جامد و ساعتها تبدا توسع دايرتك علشان يزيد ربحك؟ إيه أكتر وقت بتبيع فيه؟ وفيه إيه بيخسرك وانت مش واخد بالك فتغير المنتج او تعمل عليه تعديلات ليوافق احتاج العملاء؟ يبقى لازمك حاجة اسمها "تحليل بيانات". طب يعنى إيه الكلام ده؟ خلينى أشرحلك ببساطه: تحليل البيانات... زى إيه؟ تخيل معايا إنك جمعت كل الفواتير، وكل أرقام البيع، وتقييمات العملاء، وحطيتهم قدامك على ورقة كبيرة. لو سِبتهم كده، هتفضل مجرد أرقام. لكن لو جيت بدأت تربطهم ببعض وتفهم منهم إيه اللى بيحصل، كده انت بتحلل البيانات. يعنى بدل ما تقول "والله الشغل ماشى"، هتقول "المبيعات زادت ٢٠٪ الشهر ده عشان عملنا عرض في أول أسبوع"، أو "المنتج الفلانى بيخسرنا، لازم نوقفه". هل لازم نجيب محلل بيانات؟ وهنا ييجي السؤال اللى دايمًا بنسمعه: هل لازم نجيب حد متخصص؟ ولا أى موظف ممكن يعمل الشغل ده؟ أى موظف ممكن يعمل جزء بسيط لو عنده شوية خبرة فى Excel أو Google Sheets. لكن لو بتدير شركه فيها بيانات كتير أو عاوز تطور بجد وتفهم السوق أكتر، يبقى لازم تجيب محلل بيانات حقيقى. ليه؟ لأنه مش بس بيعرف يستخدم أدوات، ده كمان بيفهم الأرقام وبيترجمها لقرارات تنقذ شركتك أو تكبرها. تحليل البيانات هيفيدك فى إيه بقى؟ تاخد قرارات مبنية على حقايق مش توقعات تكتشف فرص جديدة للربح تعرف العيوب وتصلّحها قبل ما تكبر تتابع أداء الموظفين والمبيعات بشكل دقيق تقلل الهدر والتكاليف يعنى باختصار؟ "تحليل البيانات" مش رفاهية، ده بقى أداة بقاء! والشركات اللى بتشتغل بدون تحليل بيانات، زى اللى سايق عربيه ومغمي عينه